Azərbaycan Universitetində Milli Qurtuluş Gününə həsr olunmuş tədbir keçirilib

Azərbaycan Universitetində “15 İyun – Milli Qurtuluş Günü”nə həsr olunmuş tədbir keçirilib. İctimai elmlər kafedrası tərəfindən təşkil olunan tədbirdə bildirilib ki, 15 iyun müasir Azərbaycan tarixinin müstəsna əhəmiyyətə malik dönüş nöqtələrindən biridir. Ümumilli lider Heydər Əliyevin Azərbaycana ikinci dəfə rəhbərliyi vətəndaş müharibəsinin astanasında olan xalqımızı böyük bir fəlakətdən xilas edib, ölkəmizin bu günkü inkişafını şərtləndirən siyasi və iqtisadi islahatların təməli qoyulub.

Tədbir Azərbaycan Respublikasının Dövlət Himninin səsləndirilməsi ilə başlayıb.

Tədbiri giriş sözü ilə elmi işlər üzrə prorektor, professor Yusif Qasımov açaraq qeyd edib ki, Azərbaycan Universitetində dövlətçilik tariximizin bəzən kədərli, bəzən qürurlu hadisələrinə həsr olunmuş tədbirlərin keçirilməsi ənənə halını alıb. Belə mühüm hadisələrdən biri də ümummilli lider Heydər Əliyevin Azərbaycan Respublikası Milli Məclisinin sədri seçildiyi 1993-cü il 15 iyun tarixidir. Ölkəmizin 1991-ci ildə bərpa etdiyi müstəqilliyin qorunub saxlanması birmənalı olaraq ümummilli lider Heydər Əliyevin tarixi xidmətidir. Xalqımız ümummilli liderin  Azərbaycan rəhbərliyinə qayıdışı ilə tarixi sınaqdan üzüağ çıxıb, dönüş nöqtəsini uğurla keçib və dövlətçilik ənənələrini yeni müstəvidə daha da zənginləşdirib.

Xarici dillər kafedrasının müdiri, dosent Samirə Məmmədova “Ümummilli lider Heydər Əliyevin Azərbaycanın müasir tarixində xidmətləri” mövzusunda çıxışnda bildirib ki, 1993-cü ilin 15 iyun tarixində böyük xilaskarlıq missiyasını öz üzərinə götürən ümummilli lider Heydər Əliyevin ətrafında sıx birləşərək öz gələcək taleyini özü həll etmək niyyətində olan xalqımız bu görkəmli siyasətçi və böyük şəxsiyyətin rəhbərliyində qurtuluşdan böyük inkişafa gedən şərəfli bir yol keçib. Bu gün bizim yaşadığımız Azərbaycan Heydər Əliyevin görmək istədiyi Azərbaycandır. Xalqımızın əldə etdiyi bütün uğurların əsasında ümummilli lider tərəfindən müəyyənləşdirilən siyasi kurs və Prezident İlham Əliyevin bu siyasi kursu uğurla davam etdirməsi faktı dayanır. İctimai elmlər kafedrasının professoru Qasım Hacıyevin çıxışı isə “Heydər Əliyevin Dağlıq Qarabağa erməni iddialarına qarşı mübarizəsi” mövzusuna həsr olunub. Çıxışda bildirilib ki, erməni millətçiləri tərəfindən xalqımıza qarşı həyata keçirilən kütləvi qırğın, deportasiya, etnik təmizləmə, soyqırımı və təcavüzkarlıq siyasətinin əsil mahiyyəti ümummilli lider Heydər Əliyev siyasi hakimiyyətə qayıtdıqdan sonra açıqlanıb, bu hadisələrə siyasi-hüquqi qiymət verilib.

İctimaiyyətlə əlaqələr şöbəsi
14.06.2022