Azərbaycan Universitetinin Turizm işinin təşkili ixtisası üzrə təhsil alan I kurs tələbələri üçün “Təmiz Şəhər” ASC-nin təsərrüfat sahələrinə məlumat turu təşkil olunub. Tələbələrə Maliyyə və mühasibat kafedrasının müdiri Nəriman Böyükkişi rəhbərlik edib. 

“Təmiz Şəhər” ASC-nin İctimaiyyətlə əlaqələr şöbəsinin müdiri Orxan Cabbarov tələbələrə müəssisənin fəaliyyəti, Bakı şəhərində bərk məişət tullantılarının idarə edilməsi və təkrar emal prosesi ilə bağlı ətraflı məlumat verib. Tələbələr məlumat turu çərçivəsində Balaxanı Bərk Məişət Tullantılarının Çeşidlənməsi Zavodu, Balaxanı Sənaye Parkının istehsal sahələri ilə tanış olublar.  

Çeşidləmə prosesində toplanan dəyərli əşyalardan yaradılan kiçik muzey tələbələr tərəfindən maraqla qarşılanıb. Həmçinin bildirilib ki, toplanan dəmir pullar xeyriyyə məqsədilə istifadə olunur. 

Orxan Cabbarov qeyd edib ki, Balaxanı Sənaye Parkında təkrar istehsal sahəsinə maraq göstərən sahibkarlar üçün əlverişli şərait yaradılıb və tullantı ilə işləyən 27 rezident qeydiyyatdan keçib. Burada işlənmiş mühərrik yağlarının, tullantı plastik butulka və materialların, kağız-karton məmulatlarının təkrar emalı sahələri üzrə rezidentlər  fəaliyyət göstərir.

Orxan Cabbarov tələbələrə Bakı Bərk Məişət Tullantılarının Yandırılması Zavodunun fəaliyyəti haqqında da məlumat verib. Bildirib ki, 20 hektar ərazidə inşa olunan və 2012-ci ildə fəaliyyətə başlayan zavod tullantıların yandırılması prosesi nəticəsində il ərzində 200 milyon kilovat saata qədər elektrik enerjisi hasil etmək gücünə malikdir. İl ərzində burada əldə edilən enerji ilə 100 min ev təsərrüfatını elektrik enerjisi ilə tam təmin etmək mümkündür.

Məlumat turu başa çatandan sonra tələbələr Balaxanı qəsəbəsinə ekskursiya ediblər. 

Qeyd edək ki, məlumat turu və ekskursiya  Azərbaycan Respublikası Prezidentinin 25 dekabr 2023-cü il tarixli Sərəncamını rəhbər tutaraq Azərbaycan Universitetinin “Yaşıl dünya naminə həmrəylik ili” və “COP29” çərçivəsində həyata keçirilən tədbirlər planına uyğun olaraq təşkil olunub. 

İctimaiyyətlə əlaqələr şöbəsi