Azərbaycan Universitetinin Xarici Dillər kafedrası akademik yazı bacarıqlarının inkişafına həsr olunmuş təlimlər çərçivəsində “Compare & Contrast Essay” mövzusunda növbəti təlim təşkil edib. Təlimi kafedranın müəllimi Sübi Qənbərova aparıb. Təlimdə Xarici dillər kafedrasının heyəti ilə yanaşı, Tərcümə və filologiya kafedrasının müəllimləri də iştirak ediblər. 

Təlim zamanı iştirakçılara mövzu haqqında ətraflı məlumat verilib, esse növünün əsas xüsusiyyətləri, strukturu, məzmunun tərtibatı və yazılma qaydaları izah edilib. Həmçinin Sübi Qənbərova müqayisə və təzad üsullarının düzgün tətbiqi, uyğun keçid cümlələrindən istifadə edilməsi və məzmunun məntiqli şəkildə inkişaf etdirilməsi ilə bağlı tövsiyələr verib.

Bundan əlavə, iştirakçılar təlim ərzində öyrəndikləri biliklər əsasında “Compare & Contrast Essay” yazıblar. 

Tədbir sual-cavab və müzakirə şəklində davam edib, iştirakçılar mövzu ilə bağlı fikir mübadiləsi apararaq akademik yazı bacarıqlarının inkişafına dair əlavə məqamları müzakirə ediblər.

İctimaiyyətlə əlaqələr şöbəsi