Azərbaycan Universitetində 8 Noyabr - Zəfər Gününə həsr olunan tədbir keçirilib. Maliyyə və mühasibat kafedrasının təşkilatçılığı ilə keçirilən tədbirdə Dövlət Himni səsləndirilib, Azərbaycanın müstəqilliyi və ərazi bütövlüyü uğrunda canlarından keçən şəhidlərin xatirəsi bir dəqiqəlik sükutla yad edilib. 

Ardınca Maliyyə və mühasibat kafedrasının müdiri Nəriman Böyükkişi açılış nitqi ilə çıxış edib. Kafedra müdiri çıxışında 44 günlük Vətən müharibəsinin taleyüklü hadisələrini xronolji ardıcıllıqla təqdim edib. 

Universitetin elmi işlər üzrə prorektoru Yusif Qasımov Zəfər Günü ilə bağlı fikir və hisslərini tədbir iştirakçıları ilə bölüşüb. Prorektor qeyd edib ki, bu gün Azərbaycanın 30 illik müstəqillik tarixinin ən şərəfli günüdür. Azərbaycan XXI əsrdə yeganə dövlətdir ki, ərazi bütövlüyünü öz hərbi gücü hesabına bərpa edib. Vətən müharibəsində dünya hərb tarixinə yenilik kimi daxil olan və indiyə qədər rastlanmayan xüsusi əməliyyatlar həyata keçirilib ki, bu taktika və strategiyalar beynəlxalq hərbi ekspetlər tərəfindən ciddi təhli olunur və öyrənilir. 

Daha sonra 44 günlük Vətən müharibəsinin iştirakçıları - Azərbaycan ordusunun Təlim Tədris Mərkəzinin kafedra rəisi, polkovnik Klos Abbasov, Milli Müdafiə Universitetinin kafedra rəisinin müavini, polkovnik Elman Təhməzovun çıxışları dinlənilib. Çıxışlarda  1988-1994-cü illər ərzində Azərbaycan torpaqlarının öz havadarlarının köməyi və dəstəyi ilə ermənilər tərəfindən işğal olunmasının nəticələri haqqında məlumat verilib. Qeyd olunub ki, milli ruh və həmrəylik Vətən müharibəsində möhtəşəm zəfərin əldə olunmasında böyük rol oynayıb. Bu tarixi zəfərin qazanılmasında təkcə hərbçilərin deyil, hər vətəndaşın böyük əməyi var. 

Azərbaycan Universitetinin məzunu və Aprel şəhidi Fəxrəddin Qurbanlının atası Seyfəddin Qurbanlı övladının xatirəsinin əziz tutulmasına görə universitet rəhbərliyinə, professor-müəllim heyətinə və tələbələrə təşəkkür edib.  Vətən müharibəsi iştirakçısı, Kompüter mühəndisliyi ixtisası üzrə IV kurs tələbəsi Elvin Mədinov çıxışında keçdiyi döyüş yolundan fraqmentlər təqdim edib. 

Sonda 8 Noyabr-Zəfər Gününə həsr olunan videoçarx nümayiş olunub, xatirə şəkili çəkdirilib.  

                                                                        İctimaiyyətlə əlaqələr şöbəsi