Azərbaycan Universiteti COP günlərində məsafədən tədris prosesinə tam hazırdır. Azərbaycanın mötəbər iqlim konfransı COP29-a evsahibliyi etməsi ilə əlaqədar olaraq dərslər 2024-cü il noyabrın 12-dən 22-dək məsafədən – “Microsoft Teams” platforması üzərindən, cari dərs qrafikinə uyğun olaraq eyni saatlarda təşkil olunacaq.

Universitetdə məsafədən dərslərlə bağlı hazırlıqlar yekunlaşıb. Tədris şöbəsi və dekanlıqlar tərəfindən müvafiq tədbirlər görülüb, maarifləndirmə işləri aparılıb.  professor-müəllim heyəti və tələbələr üçün təlimat, o cümlədən video-təlimat hazırlanaraq onların elektron poçt ünvanlarına göndərilib. Təlimlər təşkil olunub və məsafədən tədris pilot qruplarda test rejimində sınaqdan keçirilib.

Qeyd edək ki, koronavirus pandemiyası dövründə də Azərbaycan Universitetində dərslər “Microsoft Teams” platforması üzərindən məsafədən təşkil olunub. Universitetin bu istiqamətdə uğurlu təcrübəsi var, o cümlədən zəruri infrastruktur və maddi-texniki təchizat mövcuddur. 

                                                                         İctimaiyyətlə əlaqələr şöbəsi