Azərbaycan Universitetinin nümayəndə heyəti İtaliyada işgüzar səfərdədir. Rektorun müşaviri, Beynəlxalq Magistratura və Doktorantura Mərkəzinin direktoru Nüşabə Quliyeva və Beynəlxalq əlaqələr şöbəsinin müdiri Elmira İsmayılova Tuscia Universitetində keçirilən  “International Week” (Beynəlxalq həftə) tədbirində iştirak edirlər. 

Bir sıra ölkələrin nümayəndələrinin iştirakı ilə keçirilən tədbirin ilk günündə iştirakçılara Tuscia Universitetinin “Erasmus+” proqramları çərçivəsində davam edən layihələri haqqında məlumat verilib, həmçinin ikili diplom proqramları, “Erasmus qarışıq intensiv proqramları” (Erasmus Blended Intensive Programmes) və beynəlmiləlləşmə mövzularında müzakirələr aparılıb. 

Tədbirin məqsədi universitetlərarası əməkdaşlığın və beynəlxalq təcrübənin gücləndirilməsidir. İştirakçılar müxtəlif ölkələrdən olan həmkarları ilə əlaqə quraraq, təhsil və tədqiqat sahəsində birgə layihələrin inkişafı istiqamətində əməkdaşlığın əsasını qoyurlar.

Qeyd edək ki, Azərbaycan Universiteti İtaliyanın Tuscia Universiteti ilə 2023-cü ildən başlayaraq MBA proqramının Marketinq istiqaməti üzrə beynəlxalq  ikili diplom proqramı həyata keçirir. 

İctimaiyyətlə əlaqələr şöbəsi