Azərbaycan Universitetinin magistratura səviyyəsinin Gənclərlə iş ixtisası üzrə təhsil alan II kurs tələbəsi Hacı Soduyev “İşğaldan azad olunmuş ərazilərə qayıdan şəxslərə sosial xidmətlərin təşkili” mövzusunda dissertasiya işinin hazırlanması məqsədilə Qarabağ regionuna səfər edib.

Hacı Soduyev səfər çərçivəsində Zəngilan, Şuşa, Füzuli və Laçın rayon icra hakimiyyətləri, Füzuli rayonu Mirzə Uluqbəy adına 1 nömrəli tam orta məktəb, 37 nömrəli ümumi orta məktəb, 39 nömrəli tam orta məktəb, Ağalı kənd tam orta məktəbini ziyarət edib, həmçinin Xankəndi şəhərində olub. Magistrant sosial xidmətlərin təşkili ilə yerində tanış olub, anket sorğusu keçirib, aidiyyəti qurumların nümayəndələri ilə görüşüb.

Hacı Soduyev Qarabağ Universitetini də ziyarət edib, bu ali məktəbin rektoru Şahin Bayramov ilə görüşüb. Müsahibə formatında təşkil olunan görüşdə rektor qeyd edib ki, universitetin məqsədi təhsil verməklə yanaşı, bölgənin dirçəlişinə də töhfə verməkdir. Xankəndiyə təhsillə qayıdış ideyası Qarabağın yenidən qurulmasında bilik və innovasiyanın əsas rol oynadığını vurğulayır. “Qarabağ Universitetini qurmaq, elə Qarabağı qurmaq deməkdir” – deyə rektor bildirib. 

İctimaiyyətlə əlaqələr şöbəsi