Azərbaycan Universitetinin Humanitar və sosial elmlər fakültəsinin Regionşünaslıq ixtisası üzrə təhsil alan II kurs tələbələri Sosial-siyasi antropologiya fənni çərçivəsində 25 Noyabr – Qadınlara qarşı Zorakılıqla Beynəlxalq Mübarizə Gününə həsr olunmuş tədbirdə iştirak ediblər. Tədbir Azərbaycan Universitetinin Sosial işin təşkili kafedrasının müəllimi, fəlsəfə üzrə fəlsəfə doktoru, dosent Rəna Məmmədovanın təşəbbüsü ilə təşkil olunub.

Tədbirin məqsədi tələbələrdə zorakılığa qarşı ictimai məsuliyyət hissini formalaşdırmaq, qadınlara qarşı zorakılığın sosial səbəblərini təhlil etmək və bu problemin aradan qaldırılması yollarını müzakirə etmək olub. Tədbir qadın hüquqları barədə məlumatlılığı artırmağı və zorakılığın təhlükəli nəticələrinə diqqət çəkməyi də hədəfləyib.

Tədbirdə qadınlara qarşı zorakılıq, növləri, qarşısının alınması yolları müzakirə olunub, zorakılığın görünməyən tərəflərinin -  psixoloji, iqtisadi və emosional formalarının qadınlara ciddi təsir göstərdiyi, onları sarsıtdığı diqqətə çatdırılıb.  Cəmiyyətdə normallaşdırılan davranışların - qışqırıq, təhqir, qadının davranış və geyiminə müdaxilə, onu dəyərsizləşdirmə kimi halların da zorakılıq olduğu qeyd olunub.  Vurğulanıb ki, qadınlara qarşı zorakılıq ilə mübarizə yalnız bir günlə məhdudlaşmamalıdır.

Qeyd edək ki, BMT Baş Assambleyası 1999-cu ildə 25 noyabr Qadınlara qarşı Zorakılıqla Beynəlxalq Mübarizə günü (International Day for the Elimination of Violence against Women) elan edib. Hər il ictimaiyyətin diqqətini bu problemə yönəltmək üçün dünyada, o cümlədən Azərbaycanda həmin gün genişmiqyaslı tədbirlər keçirilir. 

İctimaiyyətlə əlaqələr şöbəsi