Azərbaycan Universitetinin Biznes və İqtisadiyyat fakültəsinin Tələbə Elmi Cəmiyyətinin (TEC) təşkilatçılığı ilə  “Quruyan Xəzər: regional təhlükə və insan amilinin gücü” mövzusunda tədbir keçirilib. Tədbir Xəzər dənizinin qurumasının səbəb və nəticələrini əks etdirən videoçarxın nümayişi ilə başlayıb. 

Fakültənin dekanı Tural Qocayev tədbirdə açılış nitqi ilə çıxış edərək mövzunun aktuallığını və Xəzər dənizinin mühafizəsinin əhəmiyyətini vurğulayıb.

Ardınca  TEC sədri Aytən Aslanova, sədr müavini Nəzrin Məmmədzadə, tələbələr Aygül Fərhadzadə və Nərmin Abdullayeva Xəzər dənizinin qurumasının səbəbləri, Azərbaycan iqtisadiyyatına və regional münasibətlərə təsiri, ekoloji əməkdaşlığın zəruriliyi və bu kimi mövzular  haqqında hazırladıqları təqdimatlarla çıxış ediblər. 

Daha sonra tədbirin qonağı, BP şirkətinin yüksək səviyyəli uyğunluq və karbon emissiyası üzrə mütəxəssisi Anar Mehdiyev Xəzər dənizinin quruması ilə bağlı problemləri, balıq ehtiyatlarının azalmasını və Volqa çayı ilə su axınının əhəmiyyətini diqqətə çatdırıb. O, həmçinin qlobal iqlim dəyişikliyi və qurumanın dənizçilik sahəsinə, o cümlədən donanmanın fəaliyyətinə təsirlərindən bəhs edib. Anar Mehdiyev çıxışının sonunda tələbələrin təqdimatlarını yüksək qiymətləndirdiyini bildirib və şərhlərini bölüşüb.

Sonda kafedranın müəllimləri Əmirxan Paşayev, Fədai Mərdanlı və Çingiz Məmmədov çıxış edərək ölkənin su ehtiyatlarının məhdudluğu və işğaldan azad olunmuş ərazilərdəki su resurslarının bərpasının ümumi vəziyyəti qismən yaxşılaşdırdığı barədə fikirlərini bildiriblər. 

Tədbir tələbələrin təqdimatlarının müzakirəsi ilə yekunlaşıb. 

İctimaiyyətlə əlaqələr şöbəsi