Azərbaycan Universitetində Sosial işin təşkili kafedrasının təşəbbüsü ilə “Reproduktiv sağlamlıq” mövzusunda maarifləndirici sessiya keçirilib. Tədbirin məqsədi gənclərə öz bədənlərini tanımağın, ona düzgün qayğı göstərməyin gələcəkdə sağlam həyat tərzinin formalaşmasında mühüm rol oynadığını aşılamaq, eləcə də onların fiziki, emosional və sosial rifahının təmin edilməsinin vacibliyini vurğulamaq olub.

Sessiyada kafedranın müəllimi Ülviyyə Mirzəyeva təqdimatla çıxış edərək təlim zamanı gənclərin reproduktiv sağlamlığının qorunması ilə bağlı bir sıra vacib məqamlara diqqət çəkib. O, şəxsi gigiyenaya riayət etməyin, qorunma vasitələrindən istifadə etməyin arzuolunmaz hamiləliyin və cinsi yolla keçən infeksiyaların qarşısının alınmasında mühüm rol oynadığını qeyd edib. Davamlı tibbi müayinələrin aparılması, vaxtaşırı ginekoloqa və ya androloqa müraciət etməyin sağlamlıq problemlərinin erkən aşkarlanmasına əhəmiyyətli dərəcədə kömək etdiyini bildirən Ülviyyə Mirzəyeva sağlam münasibətlərin qurulmasının və məlumatların sosial şəbəkələrdən deyil, etibarlı mənbələrdən və mütəxəssislərdən əldə edilməsinin vacibliyini xüsusi vurğulayıb.

İctimaiyyətlə əlaqələr şöbəsi