Azərbaycan Universitetində Riyaziyyat və informatika kafedrasının təşkilatçılığı ilə “Süni intellekt sistemlərinin inkişafı: cari vəziyyət, çağırışlar və perspektivlər” mövzusunda seminar keçirilib. Elmi işlər üzrə prorektor Yusif Qasımov, İnformasiya-kommunikasiya texnologiyaları fakültəsinin dekanı Asif Paşayev, Riyaziyyat və informatika kafedrasının müdiri Rəşad Məstəliyev, kafedranın professor-müəllim heyəti və tələbələrin iştirak etdiyi seminarı data analitikası üzrə ekspert Oqtay İbrahimov aparıb. 

Oqtay İbrahimov məruzəsində data analitikasının mahiyyəti, məqsədi, mərhələləri, tətbiqi haqqında məlumat verib. Qeyd edib ki, data analitikası yeni sahədir və içində yaşadığımız əsrin “neft”idir. Data analitikası böyük həcmli məlumatların idarə olunması və emalında, həmçinin qərar qəbuletmə prosesində böyük rol oynayır. 

Ekspert məruzəsində “İnternet iqtisadiyyatı” mövzusuna da toxunub, iqtisadiyyatın yeni istiqaməti və növü olduğunu bildirib.  İnternet iqtisadiyyatının daha çevik mühit yaratdığını vurğulayıb və üstünlüklərini qeyd edib. 

Oqtay İbrahimov seminar iştirakçılarına süni intellektin zamanla tarixə qovuşduracağı və yaxın gələcəkdə yaranmasına səbəb olacağı peşə və ixtisaslarla da bağlı ətraflı məlumat verib və  bu prosesin artıq başladığını bildirib. 

Ardınca Elmi işlər üzrə prorektor Yusif Qasımov çıxış edərək mövzunun əhəmiyyətini vurğulayıb, tədbirin təşkilinə görə Riyaziyyat və informatika kafedrasına təşəkkür edib.  

Sonda iştirakçıların sualları cavablandırılıb.

İctimaiyyətlə əlaqələr şöbəsi