XƏBƏRLƏR
Azərbaycan Universitetində Dövlət Müstəqilliyi Günü qeyd olunub
Azərbaycan Universitetində 18 oktyabr - dövlət müstəqilliyinin bərpasının 28-ci ildönümünə həsr olunmuş tədbir keçirilib. Universitet rəhbərliyi, professor-müəllim və tələbə heyətinin iştirak etdiyi tədbir Dövlət Himninin səsləndirilməsi ilə başlayıb.
Tədbirdə 1991-ci il oktyabrın 18-də Azərbaycanın Dövlət Müstəqilliyi haqqında Konstitusiya Aktının qəbul edilməsinin böyük tarixi hadisə olduğu bildirilib, bu tarixi hadisəni zəruriləşdirən xronikaya nəzər salınıb. Qeyd olunub ki, Konstitusiya Aktının qəbul edilməsi ilə XX əsrdə ikinci dəfə öz müstəqilliyini əldə edən Azərbaycan Respublikası özünü 1918-1920-ci illərdə cəmi 23 ay mövcud olmuş Azərbaycan Xalq Cümhuriyyətinin varisi elan edib. AXC-nın bayrağı, gerbi, himni və İstiqlal Bəyannaməsinin elan edildiyi 1918-ci ilin 28 may günü Respublika Günü kimi qəbul edilib.
Müstəqilliyin bərpası qədər onun qorunub saxlanılması, hazırki mərhələyə çatdırılması olduqca keşməkeşli proseslərdən keçib. Ölkəmiz müstəqilliyinin ilk illərində çətin sınaqlar, ağır çətinliklərlə üzləşib. Ümummilli lider Heydər Əliyev zəngin siyasi təcrübəsi və yüksək idarəçilik bacarığı ilə dövlət müstəqilliyini real təhlükələrdən xilas edib, Azərbaycan möhkəm əsaslar üzərində yeni inkişaf mərhələsinə qədəm qoyub. Dövlət müstəqilliyimiz bu gün cənab Prezident İlham Əliyevin həyata keçirdiyi uğurlu və çoxşaxəli siyasət nəticəsində daha da güclənir.
Tədbir konsert proqramı ilə başa çatıb.
İctimaiyyətlə əlaqələr şöbəsi
18.10.2019