XƏBƏRLƏR
Azərbaycan Universitetində akademik Məmməd Cəfər Cəfərovun 110 illik yubileyi qeyd olunub
Azərbaycan Universitetində XX əsr Azərbaycan ədəbiyyatşünaslığının görkəmli siması, akademik Məmməd Cəfər Cəfərovun 110 illik yubileyi qeyd olunub. Azəbaycan dili və ədəbiyyat kafedrasının təşkilatçılığı ilə keçirilən “Böyük alim Məmməd Cəfər” adlı tədbirdə akademikin Azərbaycan ədəbiyyatşünaslığında Azərbaycan romantizminin nəzəri əsaslarını, ideya xüsusiyyətlərini, dünya romantizmi ilə oxşar və fərqli cəhətlərini, romantik lirikanın hansı imkanlara malik olduğunu müəyyənləşdirən alim kimi xüsusi yer tutduğu qeyd olunub, yaradıcılığının müxtəlif mərhələ və aspektlərinə toxunulub, Azərbaycan ədəbiyyatının dünya ədəbiyyatına yaxınlaşmasında xidmətləri və irsinin öyrənilməsinin vacibliyi qeyd olunub.
Azərbaycan dili və ədəbiyyat kafedrasının müdiri Ülviyyə Rəhimova alimin həyat və yaradıcılığından söz açaraq bildirib ki, Azərbaycan ədəbiyyatşünaslıq elmində akademik Məmməd Cəfər Cəfərovun müstəsna xidmətləri vardır. Azərbaycan-rus ədəbi əlaqələri, Azərbaycan və Avropa klassik ədəbi irsi, romantizmin tədqiqi və bu kimi mövzulara həsr olunmuş 30-dan çox monoqrafiya, kitab, dərslik, 300-dən çox məqalə onu tənqidçi, ədəbiyyatşünas-alim kimi səciyyələndirir. "Rus ədəbiyyatı tarixi oçerkləri", "Rus klassikləri" və üç cildlik "XIX əsr rus ədəbiyyatı tarixi" dərslikləri, "Klassiklərimiz haqqında", "M.F.Axundovun ədəbi tənqidi görüşləri", "Ədəbi düşüncələr", "Füzuli düşünür" , "Hüseyn Cavid", "Azərbaycan ədəbiyyatında romantizm", "Cəlil Məmmədquluzadə", "Estetik zövq haqqında", "Mütəfəkkirin şəxsiyyəti", "Estetik tərbiyə, ailə və məktəb", "Həyatın romantikası", "Sənət yollarında", "Nizaminin fikir dünyası" və digər kitab və monoqrafiyaları Azərbaycan ədəbiyyatşünaslığı tarixində öz elmi sanbalını, aktuallığını bu gün də saxlayan əvəzsiz mənbələrdir. Zəngin və çoxşaxəli elmi fəaliyyəti ilə yanaşı, akademik Məmməd Cəfər Cəfərov bədii yaradıcılıqla da məşğul olub, "Zurnaçı", "M.N.", "Dəmdəməki", "Zorən təbib", "M.Zeynaloğlu" imzaları ilə hekayələr çap etdirib, miniatür, novella, povest janrlarında qələmini sınayıb.
Azərbaycan Universitetinin professoru, AMEA-nın müxbir üzvü, Əməkdar elm xadimi Kamran Əliyev çıxışında Məmməd Cəfərin tələbəsi olmasını qeyd edərək onunla bağlı xatirələrini bölüşüb. Kamran Əliyev akademikin həyat yolunda acılı-şirinli günlərindən, repressiya dövründə təqiblərə məruz qalmasından, müəlimlik fəaliyyətindən söz açaraq deyib: “Hər bir insan öz həyatında qazandığı uğurlara görə ilk növbədə öz müəllimlərinə borcludur. Bu baxımdan mən qürurla deyə bilərəm ki, mənim müəllimim Məmməd Cəfər olub”. Kamran Əliyev bildirib ki, Məmməd Cəfər Cəfərov həm pedaqoji sahədə, həm də elmi kadrların hazırlanması istiqamətində təqdirəlayiq işlər görüb. O, apardığı tədqiqatlar ilə Azərbaycan ədəbiyyaşünaslıq elminə böyük töhfələr verən görkəmli alimdir.
Filologiya üzrə elmlər doktoru, professor Asif Hacıyev çıxışında Məmməd Cəfərin Azərbaycan ədəbiyyatşünaslığında və fikir tarixindəki yeri, əsərlərinin əhəmiyyəti, elmi xüsusiyyətləri haqqında məlumat verib. Asif Hacıyev qeyd edib ki, görkəmli alimin irsindəki tədqiq edilməli, öyrənilməli məqamlar aydınlaşdıqca Azərbaycan ədəbiyyatşünaslığının tarixi daha da zənginləşmiş olacaq. Professor Məmməd Cəfər Cəfərovun publisistik fəaliyyətinin də tədqiq edilməsinin əhəmiyyətini vurğulayıb.
Sonda tələbələrin sualları cavablandırılıb, xatirə şəkili çəkdirilib.
Qeyd edək ki, tədbir Azərbaycan Respublikası Prezidenti cənab İlham Əliyevin akademik Məmməd Cəfər Cəfərovun 110 illiyinin qeyd edilməsi haqqında 15 aprel 2019-cu il tarixli Sərəncamına uyğun olaraq təşkil olunub.
İctimaiyyətlə əlaqələr şöbəsi
17.12.2019