Azərbaycan Universiteti və Ədliyyə Nazirliyinin Probasiya xidməti arasında imzalanmış əməkdaşlıq haqqında memorandumdan irəli gələn vəzifələrin icrası ilə bağlı işçi qruplarının ilk iclası keçirilib.

İclasda Azərbaycan Universitetini rektorun müşaviri, Beynəlxalq Magistratura və Doktorantura Mərkəzinin direktoru Nüşabə Quliyeva, Sosial işin təşkili kafedrasının müdiri Nigar Şahhüseynbəyova, Sosial-Psixoloji Tədqiqat və Məsləhət Mərkəzinin direktoru Aygün Muradlı təmsil edib. Probasiya Xidmətindən isə rəis müavini Anar Cəfərov, Sosial Adaptasiya və Reabilitasiya şöbəsinin rəisi Səyyad Məcidov, şöbənin aparıcı məsləhətçisi Aynur Kərimova və Bakı şəhər Probasiya idarəsinin böyük icra məmuru Rövşən Ağayev iştirak edib.

İclasda 2025-ci ildə görüləcək işlərə dair tədbirlər planı müzakirə edilib, qarşılıqlı fikir mübadiləsi aparılıb. Tədbirlər planına əsasən il ərzində probasiya nəzarətində olan şəxslərin sosial adaptasiyası və reabilitasiyasının təşkili məqsədilə mütəxəssislərin, könüllülərin iştirakı ilə birgə layihələrin təşkili; müasir və qabaqcıl elmi-tədris, praktiki metodların tətbiqi üzrə araşdırmalar aparılmaqla tədris proqramlarının və dərs vəsaitlərinin hazırlanması; probasiya məmurları üçün təlimlərin təşkili; tələbələrin təcrübə keçmək məqsədilə probasiya xidmətinə cəlb olunması; universitetdə probasiya sahəsi üzrə mühazirə və seminarların təşkili; probasiya nəzarətində olan  şəxslərlə sosial işin təşkili  sahəsində yüksək ixtisaslı və peşəkar kadr hazırlığının həyata keçirilməsi məqsədilə universitetin  mövcud təhsil proqramlarının təkmilləşdirilməsi və bu kimi işlərin görülməsi nəzərdə tutulub. 

Qeyd edək ki, Azərbaycan Universiteti və Azərbaycan Respublikası Ədliyyə Nazirliyinin Probasiya xidməti arasında ötən ilin oktyabr ayında əməkdaşlıq haqqında memorandum imzalanıb. 

İctimaiyyətlə əlaqələr şöbəsi