XƏBƏRLƏR
Anar müəlimi yeni yaşı münasibətilə təbrik edirik
Bu gün tarix elmləri doktoru, professor Anar İsgəndərovun 62 yaşı tamam olur. Azərbaycan Universitetinin kollektivi adından Anar müəllimi yeni yaşı münasibətilə təbrik edir, can sağlığı, elmi-pedaqoji fəaliyyətində yeni uğurlar arzulayırıq!
Anar Camal oğlu İsgəndərov 1956-cı il yanvarın 10-da Masallı rayonunda anadan olub. 1978-ci ildə Bakı Dövlət Universitetinin Tarix fakültəsini bitirib. 1989-cu ildə Respublikada ilk dəfə tarixşünaslıq ixtisası üzrə namizədlik dissertasiyası, 2004-cü ildə “Azərbaycanda 1917-1918-ci illərdə Türk-müsəlman soyqırımı probleminin tarixşünaslığı” mövzusunda doktorluq dissertasiyası müdafiə edib. 2005-ci ildə isə professor elmi adı alıb.
1999-cu ildən Bakı Dövlət Universiteti Mənbəşünaslıq, tarixşünaslıq və metodika kafedrasının müdiri, 2005-ci ildən həmin kafedranın, 2014-cü ildən Azərbaycan Universitetinin İctimai elmlər kafedrasının professorudur.
Tədqiqat sahəsi Azərbaycanın 1917-1920-ci illər tarixinin mənbəşünaslığı və tarixşünaslığıdır.
1998-ci ildə Ankarada Türkiyə Cümhuriyyətinin 75 illiyinə həsr olunmuş beynəlxalq elmi konfransda çıxışına görə Türkiyə Cümhuriyyətinin baş nazirinin qol saatı və “Altun” qızıl medalı ilə, 2008-ci ildə Türkdilli Xalqların Əməkdaşlıq Mərkəzinin “Qızıl döş nişanı” ilə, 2009-cu ildə Azərbaycan Respublikası Prezidentinin sərəncamı ilə “Tərəqqi” medalı ilə, 2016-cı ildə Azərbaycan Respublikası Prezidentinin sərəncamı ilə Azərbaycan Xalq Cümhuriyyəti dövrünün tədqiqində xidmətlərinə görə 3-cü dərəcəli “Vətənə xidmətə görə” ordeni ilə ilə təltif olunub.
10-dan çox kitabın, onlarla məqalənin müəllifi olan görkəmli alimin “Realities of Azerbaijan: 1917-1920” (Azərbaycan həqiqətləri: 1917-1920) adlı kitabı Amerika Birləşmiş Ştatlarında nəşr olunub. Kitaba türk-erməni araşdırmaları üzrə görkəmli mütəxəssis, tarix elmləri doktoru, professor Castin Makkarti ön söz yazıb.
İctimaiyyətlə əlaqələr şöbəsi
10.01.2018