Bu gün AMEA-nın müxbir üzvü, əməkdar elm xadimi, filologiya elmləri doktoru, Azərbaycan Universitetinin professoru Kamran Əliyevin 65 yaşı tamam olur.

Görkəmli alimi Azərbaycan Universitetinin kollektivi adından 65 illik yubileyi münasibəti ilə təbrik edir, can sağlığı, elmi – pedaqoji və publisitik fəaliyyətində nailiyyətlər arzulayırıq!

Kamran İmran oğlu Əliyev 1953-cü ildə Naxçıvan MR Şərur rayonunda anadan olub. 1974-cü ildə Azərbaycan Dövlət Universitetinin filologiya fakültəsini fərqlənmə ilə bitirib. 1976-1979-cu illərdə AMEA-nın Nizami adına Ədəbiyyat İnstitutunun aspiranturasında oxuyub. 1980-ci ildə namizədlik, 1990-cı ildə doktorluq dissertasiyası müdafiə edib. Folklor İnstitutunun Elmi Şurasının və Müdafiə Şurasının, Azərbaycan Yazıçılar Birliyinin üzvüdü, AMEA Folklor İnstitutunun şöbə müdiridir.  

Romantik üslubun tədqiqatçısıdır, elmi yaradıcılığında ədəbi proseslərə ciddi diqqət yetirib. Azərbaycan romantizminin aktual problemlərinin araşdırılması, təşəkkül və formalaşma mənbələrinin ilk dəfə sistemləşdirilməsi, romantiklərin ədəbi-nəzəri görüşləri ilə bədii yaradıcılıqları arasındakı vəhdətin aşkarlanması, XX əsr Azərbaycan romantizm poetikasının incəliklərinin meydana çıxarılması Kamran Əliyevin adı ilə bağlıdır.

XX əsr Azərbaycan romantiklərinin ədəbi-nəzəri görüşləri (1985), Hüseyn Cavidin şəxsiyyəti və poetikası (1997), Mirzə Fətəlidən Hüseyn Cavidə qədər (1998), Cavid möcüzəsi (2002), Azərbaycan reomantizminin poetikası (2002), Azərbaycan romatizminin nəzəriyyəsi (2006), Romatizm və folklor (2006), Теория Азербайджанского романтизма (2006), Hüseyn Cavid: Həyatı və yaradıcılığı (2008), Abbas Zamanov olmasaydı (2011), Eposun poetikası: Dədə Qorqud və Koroğlu (2011), Tənqidin poetikası (2012) monografiyalarının, Ədəbiyat (2010), Azərbaycan dili (2011) dərs vəsaitlərinin, Sədərək Döyüşləri (1992) kitablarının müəllifidir.

Azərbaycan klassik ədəbiyyatının görkəmli nümayəndələrinin həyat və yaradıcılığı ilə bağlı fudamental tədqiqatlar aparıb, onun müəllifliyi ilə 20-dən artıq kitab, 250-dək elmi və elmi-publisistik məqalə işıq üzü görüb.

Elmi tədqiqat işləri ilə yanaşı müxtəlif illərdə ali məktəblərdə pedaqoji fəaliyyətlə məşğul olub.

2015-ci ildə prezident İlham Əliyevin sərəncamı ilə prof. Kamran Əliyevə AMEA-nın 70 illik yubileyi münasibəti ilə Azərbaycan elminin inkişafında xidmətlərinə görə “Əməkdar elm xadimi” fəxri adı verilib.

2017-ci ildə AMEA-nın müxbir üzvü seçilib.

İctimaiyyətlə əlaqələr şöbəsi
05.03.2018