XƏBƏRLƏR
Professor Qabil Əliyevi doğum günü münasibətilə təbrik edirik
Bu gün İctimai elmlər kafedrasının müdiri, tarix elmləri doktoru, professor Qabil Əliyevin doğum günüdür. Bu münasibətlə Azərbaycan Universitetinin kollektivi adından Qabil müəllimi təbrik edir, can sağlığı, elmi-pedaqoji və publisistik fəaliyyətində nailiyyətlər arzulayırıq!
Qabil Əli oğlu Əliyev 1956-cı ildə Füzuli rayonunun Merdinli kəndində anadan olub. 1962-1972-ci illərdə həmin rayonun Yuxarı Seyidəhmədli kənd orta məktəbində təhsil alıb.
1977-ci ildə Bakı Dövlət Universitetinin Tarix fakültəsini fərqlənmə diplomu ilə bitirib.
"Bakı-Tiflis dəmir yolunun çəkilməsi və onun Azərbaycanın iqtisadi, sosial və mədəni həyatına təsiri (XIX əsrin 80-90-cı illəri)" mövzusunda tarix elmləri namizədi alimlik dərəcəsi almaq üçün təqdim etdiyi dissertasiyasını 1986-cı ildə, "XIX-XX yüzilliyin başlanğıcında Şimali Azərbaycanda nəqliyyatın inkişafı" mövzusunda tarix elmləri doktoru alimlik dərəcəsi almaq üçün təqdim etdiyi dissertasiyasını isə 2003-cü ildə müdafiə edib.
2005-ci ildən professordur.
Əmək fəaliyyətinə 1977-ci ildə Füzuli rayonu Yuxarı Seyidəhmədli kənd orta məktəbində başlayıb. 1981-ci ildən Bakı Dövlət Universitetinin SSRİ tarixi (1917-ci il Oktyabr inqilabına qədərki dövr) kafedrasında müəllim, baş müəllim vəzifələrində çalışıb. 1982-1985-ci illərdə bu ali təhsil müəssisəsinin aspiranturasında "Vətən tarixi" ixtisası üzrə təhsilini davam etdirib.
1992-ci ildən Bakı Dövlət Universitetinin Türk və Qafqaz xalqları tarixi kafedrasında baş müəllim, dosent, professor əvəzi vəzifələrində çalışıb.
2013-cü ildən Azərbaycan Universitetində çalışır.
11 kitabın, onlarla elmi məqalənin müəllifidir.
İctimaiyyətlə əlaqələr şöbəsi
13.10.2018