Azərbaycan Universitetinin Siyasi və ictimai elmlər kafedrasının müdiri, siyasi elmlər üzrə fəlsəfə doktoru, dosent Elvin Talışınski Y.Yevsevyev adına Mordoviya Dövlət Pedaqoji İnstitutunun təşkilatçılığı ilə keçirilən və Böyük Vətən Müharibəsinin 80 illiyinə həsr olunan beynəlxalq elmi-praktiki konfransda açılış nitqi ilə çıxış edib.

Elvin Talışınski tədbir iştirakçılarını Azərbaycan Universitetinin rektoru Səadət Əliyeva və universitetin kollektivi adından salamlayıb, konfransın işinə uğurlar arzulayıb. 

Kafedra müdiri çıxışının davamında bildirib ki, böyük qələbənin qazanılmasında Azərbaycan xalqı həm ön, həm də arxa cəbhədə misilsiz mətanət, mərdlik və fədakarlıq nümayiş etdirib. “600 mindən çox azərbaycanlı cəbhələrdə qəhrəmanlıqla vuruşub, neftçilərimiz isə fasiləsiz çalışaraq ordunun yanacaqla təmin olunmasında həlledici rol oynayıb. Azərbaycan ardıcıl olaraq sülhün, sabitliyin və xalqlar arasında qarşılıqlı anlaşmanın tərəfdarıdır və biz inanırıq ki, yalnız birlikdə, tarixi həqiqətə arxalanaraq, müharibələr və dağıntılar olmadan gələcək qura bilərik”, – deyə Elvin Talışınski əlavə edib.

Kafedra müdiri həmçinin vurğulayıb ki, hər iki universiteti bundan sonra da elm və təhsil maraqları, beynəlxalq tərəfdaşlıqları inkişaf etdirmək və akademik əlaqələri gücləndirmək istəyi birləşdirəcək. 

İctimaiyyətlə əlaqələr şöbəsi