Azərbaycan Universitetində “İpək yolu – qloballaşmaya dəstək” İctimai Birliyi tərəfindən “Görkəmli Qərbi Azərbaycanlılar” adlı tədbir keçirilib. Tədbirdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Görkəmli Qərbi Azərbaycanlılar: Elm, Təhsil və Mədəniyyət Məbədi - İrəvan” adlı layihə çərçivəsində hazırlanmış eyni adlı video-çarx nümayiş etdirilib, veb sayt və kitab təqdim olunub.

Tədbiri giriş sözü ilə Azərbaycan Universitetinin Siyasi elmlər kafedrasının müdiri dosent Elvin Talışinski açaraq layihənin əhəmiyyətindən bəhs edib. Ardınca “İpək yolu – qloballaşmaya dəstək” İctimai Birliyinin sədri, layihə rəhbəri dosent Ədalət Əsədov layihə çərçivəsində görülən işlər haqqında məlumat verib. Sədr qeyd edib ki, layihənin məqsədi Qərbi Azərbaycanın tarixi həqiqətlərini ictimaiyyətə çatdırmaq və görkəmli şəxsiyyətlərini tanıtmaqdır. Maliyyə və iqtisadiyyat kafedrasının müdiri, dosent Nəriman Böyükkişi Qərbi Azərbaycanlıların tarixən doğma torpaqlarından didərgin salınması haqqında danışıb. 

Daha sonra layihənin eksperti Rəvan Cəfərli Qərbi Azərbaycanın görkəmli şəxsiyyətlərini tanıtmaq məqsədilə layihə çərçivəsində  yaradılan www.westaz.az veb saytının təqdimatını həyata keçirib. 

Sonda layihə çərçivəsində hazırlanmış Qərbi Azərbaycanın tarixi həqiqətlərindən bəhs edən video-çarx nümayiş etdirilib və kitab iştirakçılara paylanıb.

Tədbirdə universitetin professor-müəllim heyəti və tələbələri iştirak edib.

İctimaiyyətlə əlaqələr şöbəsi