Dövlət və ictimai münasibətlər

İxtisasın adı: Dövlət və ictimai münasibətlər
İxtisas qrupu: III
Fakültə: Humanitar və sosial elmlər
Təhsilin səviyyəsi: Bakalavriat
Təhsilin müddəti və forması: 4 il (8 semestr), əyani
Tədrisin dili: Azərbaycan dili
Məzuna verilən ixtisas dərəcəsi: Bakalavr
Təhsil haqqı: Azərbaycan bölməsi, əyani – 3200 AZN

Dövlət və ictimai münasibətlər dövlət qurumları ilə cəmiyyət arasında əlaqələrin, ictimai maraqların, dövlət siyasətinin və ictimai rəyin öyrənilməsini əhatə edən sahədir. İxtisasın əsas məqsədi dövlət-vətəndaş münasibətlərini təhlil edə bilən, ictimai problemlərin həllinə dair təkliflər hazırlayan və dövlət qurumları ilə cəmiyyət arasında səmərəli ünsiyyətin qurulmasında iştirak edən mütəxəssislər yetişdirməkdir. Bu ixtisas dövlət idarəçiliyinə və ictimai proseslərə maraq göstərən, analitik düşünməyi, insanlarla ünsiyyət qurmağı, problemlərə əsaslandırılmış həll yolları tapmağı sevən abituriyentlər üçün uyğundur.

Təhsil

Tələbələrə dövlət idarəçiliyinin əsasları, siyasi sistemlər, dövlət siyasəti, ictimai rəyin formalaşması, dövlət qurumlarının ictimaiyyətlə əlaqə mexanizmləri kimi mövzular tədris olunur. Tədris proqramından asılı olaraq ictimaiyyətlə əlaqələr, strateji kommunikasiya, siyasi təhlil, layihələrin idarə olunması və sosial tədqiqat metodları kimi fənlərin də tədrisi aparılır. Tədris prosesində tələbələrdə ictimai problemləri təhlil etmək, ictimai rəyin öyrənilməsi üçün araşdırmalar aparmaq, hesabat və təqdimatlar hazırlamaq, rəsmi yazışmalar aparmaq bacarıqları formalaşdırılır.

Karyera imkanları

Məzunlar dövlət qurumlarında, yerli özünüidarəetmə orqanlarında, ictimai təşkilatlarda, qeyri-hökumət təşkilatlarında, tədqiqat mərkəzlərində və özəl şirkətlərdə çalışa bilərlər. Mümkün fəaliyyət istiqamətlərinə dövlət qurumlarında ictimaiyyətlə əlaqələr və vətəndaş müraciətləri üzrə fəaliyyət, layihələrin idarə olunması, ictimai rəyin öyrənilməsi, kommunikasiya və sosial tədqiqatlar daxildir.

İxtisasın gələcəyi

Dövlət qurumları ilə vətəndaşlar arasında operativ və şəffaf ünsiyyətə artan ehtiyac, rəqəmsal dövlət xidmətlərinin genişlənməsi və ictimai gözləntilərin dəyişməsi dövlət və ictimai münasibətlər sahəsində mütəxəssislərin rolunu ön plana çıxarır. Dövlət qərarlarının cəmiyyətə düzgün izah edilməsi, vətəndaş müraciətlərinin təhlili və ictimai rəyin öyrənilməsi idarəetmədə mühüm istiqamətlər olaraq qalır. Rəqəmsal texnologiyaların dövlət-cəmiyyət münasibətlərinə təsiri, süni intellektin ictimai rəyin təhlilində tətbiqi bu sahədə yeni fəaliyyət istiqamətləri yaradır.

Dövlət və ictimai münasibətlər ixtisasının Təhsil Proqramını BURADAN yükləyə bilərsiniz.
Dövlət və ictimai münasibətlər ixtisasının Tədris Planını BURADAN görə bilərsiniz.