Politologiya

İxtisasın adı: Politologiya
İxtisas qrupu: III
Fakültə: Humanitar və sosial elmlər
Təhsilin səviyyəsi: Bakalavriat
Təhsilin müddəti və forması: 4 il (8 semestr), əyani
Tədrisin dili: Azərbaycan dili
Məzuna verilən ixtisas dərəcəsi: Bakalavr
Təhsil haqqı: Azərbaycan bölməsi, əyani – 3200 AZN

Politologiya siyasəti, siyasi institutları, dövlət idarəçiliyini, siyasi prosesləri və cəmiyyətlə dövlət arasındakı münasibətləri öyrənən elm sahəsidir. Bu ixtisasın əsas məqsədi tələbələrdə analtik düşünmə, araşdrıma aparmaq, müxtəlif siyasi mövqeləri müqayisə etmək və siyasi proseslər arasında səbəb-nəticə əlaqələrini anlamaq bacarıqları formalaşdırmaqdır.

Politologiya siyasətə, dövlət idarəçiliyinə, beynəlxalq proseslərə və ictimai məsələlərə maraq göstərən, hadisələrin səbəblərini araşdırmağı, müxtəlif mövqeləri müqayisə etməyi və əsaslandırılmış nəticələr çıxarmağı sevən abituriyentlər üçün uyğundur. Analitik düşünmə, araşdırma aparmaq, fikirlərini aydın ifadə etmək və mürəkkəb məsələlərə fərqli perspektivlərdən yanaşmaq bu sahədə uğur qazanmağa kömək edən keyfiyyətlərdir.

Təhsil

Politologiya ixtisasında təhsil alan tələbələr siyasi nəzəriyyələri, dövlət və hakimiyyət münasibətlərini, siyasi sistemləri, seçki proseslərini, siyasi ideologiyaları, ictimai rəyi və siyasi qərarların qəbul mexanizmlərini öyrənirlər. Tədris prosesində müxtəlif ölkələrin siyasi sistemləri müqayisə edilir, aktual siyasi hadisələr təhlil olunur, siyasi mətnlər və məlumatlar araşdırılır.

Təhsil müddətində tələbələr siyasi proseslər haqqında məlumat toplamaq və onları təhlil etmək, araşdırma aparmaq, faktlarla fikirləri fərqləndirmək, arqumentlər qurmaq, siyasi hadisələrə dair əsaslandırılmış nəticələr çıxarmaq bacarıqları qazanırlar. Yazılı və şifahi ünsiyyət, təqdimat hazırlamaq, tənqidi düşünmək və analitik hesabatlar tərtib etmək də bu sahədə formalaşdırılan mühüm bacarıqlardandır.

Karyera imkanları

Politologiya məzunları dövlət qurumlarında, yerli özünüidarəetmə orqanlarında, tədqiqat və beyin mərkəzlərində, ictimai təşkilatlarda və beynəlxalq qurumlarda çalışa bilərlər. Onlar həmçinin ictimai rəyin öyrənilməsi, siyasi təhlil, layihələrin idarə olunması sahələrində fəaliyyət göstərə bilərlər. Mümkün peşə istiqamətlərinə siyasi analitik, tədqiqatçı, layihə koordinatoru və dövlət idarəçiliyi sahəsində mütəxəssis daxildir. Konkret vəzifələrə yiyələnmək əlavə ixtisaslaşma, təcrübə, dil bilikləri və müvafiq işə qəbul tələblərindən asılıdır.

İxtisasın gələcəyi

Rəqəmsal texnologiyaların siyasi fəaliyyətə və dövlət idarəçiliyinə təsiri, süni intellektin qərarvermədə tətbiqi və rəqəmsal mühitdə ictimai rəyin formalaşması politoloqların fəaliyyət istiqamətlərini genişləndirir. Gələcəkdə siyasi hadisələrin proqnozlaşdırılması, seçici davranışlarının öyrənilməsi, ictimai rəyin təhlili və dövlət siyasətinin nəticələrinin qiymətləndirilməsində məlumat əsaslı yanaşmaların əhəmiyyətinin artması gözlənilir. Bu dəyişikliklər politologiya məzunları üçün ənənəvi siyasi təhlillə yanaşı, rəqəmsal diplomatiya, siyasi kommunikasiya, dezinformasiyanın araşdırılması, strateji risklərin təhlili və süni intellektin siyasi qərarlara təsirinin öyrənilməsi kimi istiqamətlərdə də inkişaf imkanları yaradır.

Politologiya ixtisasının Təhsil Proqramını BURADAN yükləyə bilərsiniz.
Politologiya ixtisasının Tədris Planını BURADAN görə bilərsiniz.