Fəlsəfə

İxtisasın adı: Fəlsəfə
İxtisas qrupu: III
Fakültə: Humanitar və sosial elmlər
Təhsilin səviyyəsi: Bakalavriat
Təhsilin müddəti və forması: 4 il (8 semestr), əyani
Tədrisin dili: Azərbaycan dili
Məzuna verilən ixtisas dərəcəsi: Bakalavr
Təhsil haqqı: Azərbaycan bölməsi, əyani – 2500 AZN

Fəlsəfə ixtisası insanın, cəmiyyətin, təfəkkürün və varlığın mahiyyətini, bilik və həqiqət anlayışlarını, əxlaqi dəyərləri və dünyagörüşünün formalaşması ilə bağlı məsələləri öyrənir. İxtisasın əsas məqsədi fəlsəfi problemləri araşdırmağı, müxtəlif nəzəriyyələri müqayisə etməyi, mürəkkəb məsələlərə tənqidi yanaşmağı və əsaslandırılmış nəticələr çıxarmağı bacaran mütəxəssislər yetişdirməkdir.

Təhsil

Təhsil müddətində tələbələr fəlsəfə tarixini, məntiqi, etikanı, estetikanı, idrak nəzəriyyəsini, sosial və siyasi fəlsəfəni, eləcə də insan, cəmiyyət və mədəniyyətlə bağlı fəlsəfi yanaşmaları öyrənirlər. Onlarda mətnləri və nəzəriyyələri təhlil etmək, arqumentləri qiymətləndirmək, fikirlərini məntiqi ardıcıllıqla ifadə etmək, müzakirələr aparmaq və elmi mənbələrlə işləmək bacarıqları formalaşır.

Karyera imkanları

Məzunlar elmi-tədqiqat müəssisələrində, təhsil və mədəniyyət qurumlarında, nəşriyyatlarda, analitik mərkəzlərdə və müxtəlif informasiya-təhlil sahələrində fəaliyyət göstərə bilərlər. Tədqiqat, mətnlərin hazırlanması və redaktəsi, analitik məzmunun işlənməsi, elmi-populyar materialların hazırlanması kimi istiqamətlər də onların bilik və bacarıqlarının tətbiq oluna biləcəyi sahələrdəndir.

İxtisasın gələcəyi

Süni intellektin və rəqəmsal texnologiyaların inkişafı insanın məsuliyyəti, şəxsi həyatın toxunulmazlığı, elmi fəaliyyətin etik sərhədləri və texnoloji yeniliklərin cəmiyyətə təsiri ilə bağlı yeni fəlsəfi suallar doğurur və fəlsəfi düşüncənin tətbiq sahələrini genişləndirir. Bu şəraitdə fəlsəfi biliklər mürəkkəb problemlərin müxtəlif baxış bucaqlarından qiymətləndirilməsi və texnoloji inkişafın doğurduğu dilemmalara əsaslandırılmış yanaşmaların formalaşdırılması baxımından əhəmiyyətini qoruyacaq, fəlsəfə məzunları tənqidi düşüncə və etik ekspertiza tələb edən sahələrdə mühüm rol oynamağa davam edəcəklər.

Fəlsəfə ixtisasının Təhsil Proqramını BURADAN yükləyə bilərsiniz.
Fəlsəfə ixtisasının Tədris Planını BURADAN yükləyə bilərsiniz.